796 mjete lundruese të tipeve të ndryshme janë akostuar gjatë periudhës janar-korrik të këtij viti në portin e Durrësit.
Bashkë me strukturat e APD-së, për pritjen dhe përpunimin e tyre janë angazhuar edhe institucionet ligjzbatuese si; Policia e Kufirit, Kapiteneria e Portit, Dogana, etj.
Nga të dhënat që ofron Sektori i Statistikave në APD, mësohet se numri i anijeve tregtare që janë përpunuar në të tre Terminalet është thuajse i njejtë me atë të vitit të kaluar, ndërsa për shkak të pandemisë është shënuar një rënie në lundrimin e trageteve, jahteve dhe kroçerave drejt Durrësit dhe anasjelltas.
Në Terminalin Lindor janë akostuar me qëllim përpunimi 77 anije, ndërsa në atë Perëndimor 157 anije të tjera.
Ndërkaq, në Terminalin e Konteinerëve numri i anijeve të përpunuara në 7 muaj arrin në 96.
Tragetet e linjave Durrës-Bari dhe Durrës-Ankona e anasjelltas kanë kryer 407 lundrime, ndërsa numri i jahteve arrin në 59 gjithsej.
