Që nga e djela paradite në portin e Durrësit kanë mbërritur 9 tragete, ndërsa drejt porteve të Barit dhe Ankonës (Itali) janë nisur 8 tragete me udhëtarë dhe mallra. Në 60 orët e fundit në hyrje dhe dalje të portit më të madh të vendit janë përpunuar 13.227 udhëtarë me 3108 autovetura gjithsej.
Burime zyrtare të APD bëjnë me dije se nga 9 tragetet që kanë mbërritur në tre ditët e fundit kanë zbritur në portin e Durrësit 6643 udhëtarë me 1641 autovetura gjithsej, ndërsa me 8 tragetet që kanë lundruar drejt porteve të Italisë kanë udhëtuar 6584 udhëtarë me 1467 autovetura.
Sipas të njejtave burime, numri i udhëtarëve në hyrje po bie ndjeshëm, ndërsa nga Durrësi ka nisur largimi gradual i udhëtarëve, kryesisht bashkëatdhetarë që kaluan pushimet e verës pranë familjeve të tyre.
Në fundjavë pritet të fillojë nisja masive me tragete e mijra udhëtarëve vendas dhe të huaj.
