Festat e fundvitit, FSPD zbaton planin e masave të sigurisë për tre javë radhazi 17 Dhjetor 2014

Autoriteti Portual i Durrësit në prag të festave të fundvitit ka marrë disa masa për rritjen e shkallës së sigurisë. Për më shumë se tre javë Forca e Sigurisë Portuale (FSP) do të zbatojë një plan masash, që synon rritjen e kontrollit dhe menaxhimin e hyrje-daljeve në territorin e portit.

Stafi drejtues i FSP do të zbatojë një plan masash gjatë periudhës 19 dhjetor 2014 – 12 janar 2015, veçanërisht në oraret e parashikuara për mbërritjen dhe nisjen e trageteve. Sipas këtij plani, përveç punonjësve të FSP që kryejnë shërbimin e zakonshëm, gjatë periudhës prej më shumë se tre javësh në territorin portual do të funksionojë një Grup i Gatshëm prej 6 vetësh me një përgjegjës grupi, të gjithë punonjës jashtë shërbimit në kushte normale.

Plani i detajuar parashikon bashkëpunimin me shërbimet e Komisariatit të policisë së portit, të instaluara te Sheshi i Trageteve. Dogana dhe Kapiteneria e portit janë dy institucionet e tjera, me të cilat do të shkëmbehen informacione si dhe do të bashkërendohen veprimet gjatë periudhës së festave. Trajtimi i parkingjeve të automjeteve në këtë periudhë fluksi do të jetë një tjetër detyrë e FSP, në bashkëpunim me Drejtorinë e shërbimeve operacionale në APD.

Gjatë festave të fundvitit numri i udhëtarëve dhe automjeteve që shfrytëzojnë tragetet në portin më të madh të vendit dy-trefishohet, në krahasim me periudhat e tjera të vitit.