Gjatë periudhës janar-dhjetor 2023 në Portin e Durrësit janë përpunuar 155 anije konteinerike, të cilat kanë transportuar mbi 184 mijë njësi konteinerike(TEU) me mallra të ndryshme.
Referuar të dhënave statistikore të APD-së, volumet e përpunimit të njësive konteinerike për vitin 2023 kanë shënuar një rritje të konsiderueshme në masën 38%, në raport krahasimor me vitin paraardhës.
Të njejtat burime saktësojnë, se gjatë vitit që lamë pas, në Terminalin e Konteinerëve, anijet kanë sjellë 92,100 TEU, ndërsa 91,917 TEU janë nisur për eksport drejt porteve të huaja, duke shënuar kështu një rritje prej 51,052 TEU më shumë se janar-dhjetori 2022.
Sipas shifrave analitike të APD-së, për periudhën progresive 2019-2023, sektori i konteinerëve ka njohur një rritje mesatare në masën 7%, ndërkohë që përgjatë të njejtës periudhë janë përpunuar në total 8,706,998 tonë mallra me konteinerë.
Kjo rritje konsistente e volumeve të përpunimit në kryeqendrën portuale të vendit konfirmon edhe njëherë vizionin strategjik të qeverisë shqiptare për portin e ri tregtar të Durrësit në Porto-Romano, i cili do të rrisë ndjeshëm hapësirat dhe kapacitetet e përpunimit të mallrave, duke sjellë një ndryshim thelbësor në modelin e logjistikës dhe tregtisë detare por edhe në gravitetin që infrastruktura portuale ka në ekonominë kombëtare dhe atë rajonale.
